சிங்கப்பூரில் நடந்த வரலாற்று சிறப்புமிக்க உச்சி மாநாட்டில் அணு ஆயுதங்களை ஒழிக்க வடகொரியா உறுதி

Report
9Shares

சிங்கப்பூரில் நேற்று நடந்த வரலாற்று சிறப்புமிக்க உச்சி மாநாட்டில் அமெரிக்க அதிபர் டொனால்டு ட்ரம்பும் வடகொரிய அதிபர் கிம் ஜாங் உன்னும் சந்தித்துப் பேசினர். அப்போது அணு ஆயுதங்களை ஒழிக்க வட கொரியா உறுதி அளித்தது. இதுதொடர்பான அமைதி ஒப்பந்தத்தில் இரு நாடுகளின் அதிபர்களும் கையெழுத்திட்டனர்.

ஜப்பான் ஆட்சியின் கீழ் இருந்த கொரிய தீபகற்பம் இரண்டாம் உலகப் போரின் போது மீட்கப்பட்டது. அமெரிக்கா, ரஷ்யா இடையேயான பனிப்போர் காரணமாக கொரியா இரண்டாகப் பிரிந்தது. ரஷ்யாவின் ஆதரவுடன் வடகொரிய அதிபராக கிம் இல் சங் பதவியேற்றார். அமெரிக்காவின் ஆதரவு பெற்ற தென்கொரியாவில் தேர்தல் நடத்தப்பட்டு புதிய அதிபர் தேர்ந்தெடுக்கப்பட்டார்.

அதன்பின் 1950 முதல் 1953 வரை வடகொரியாவுக்கும் தென்கொரியாவுக்கும் இடையே போர் நடைபெற்றது. இந்த போர் தற்காலிகமாக முடிந்தாலும் பதற்றம் தொடர்ந்தது. கடந்த 1994 ஜூலை 8-ம் தேதி வடகொரிய அதிபர் கிம் இல் சங் காலமானார். அவரது மகன் கிம் ஜாங்-இல் அதிபராக பதவியேற்றார். 2011 டிசம்பரில் அவர் உயிரிழந்தார். அதன்பின் கிம் ஜாங் இல்லின் இரண்டாவது மனைவியின் மகன் கிம் ஜாங் உன் வடகொரியாவின் புதிய அதிபராக பதவியேற்றார். அவர் பதவியேற்ற பிறகு அணு ஆயுத, ஏவுகணை சோதனைகள் தீவிரப்படுத்தப்பட்டதால் கொரிய தீபகற்பத்தை மீண்டும் போர் மேகம் சூழ்ந்தது. எந்நேரமும் அணு ஆயுத போர் வெடிக்கும் என்று அஞ்சப்பட்டது.

திடீர் திருப்பமாக தென்கொரியாவின் அழைப்பை ஏற்று கடந்த பிப்ரவரியில் சியோலில் நடந்த குளிர்கால ஒலிம்பிக்கில் வட கொரியா பங்கேற்றது.

அதன்பின் தென்கொரிய அதிபர் மூன் ஜே இன்னும் வடகொரிய அதிபர் கிம் ஜாங் உன்னும் சந்தித்துப் பேசினர். அப்போது அமெரிக்க அதிபர் ட்ரம்பை சந்திக்க அதிபர் கிம் விருப்பம் தெரிவித்தார். இதனை ட்ரம்ப் ஏற்றுக் கொண்டார். சில குழப்பங்களுக்குப் பிறகு இரு தலைவர்களும் சிங்கப்பூர் உச்சி மாநாட்டில் சந்தித்துப் பேச முடிவு செய்யப்பட்டது.

1272 total views